Ua faamautu le faaiuga a le Faamasinoga Maualuga i le faamuta o le faamalolo lē tumau o sui faipule o Lepa ma Faleata 3 le susuga Tuilaepa L Sailele Malielegaoi ma le tofa Lealailepule Rimoni Aiafi, ina ua faailoa mai i le amataga o lenei vaiaso le faaiuga a le faamasinoga o talosaga toe iloilo poo le faamasinoga apili a le faamasinoga maualuga a Samoa.
Ua faailoa e le faamasinoga o talosaga i lana faaiuga, o le faamalolo lē tumau o ia sui faipule o le Palemene mo le 24 masina i se fautuaga a le Komiti o amioga taualoa ma tulaga aloaia a le Palemene lea na talia e le fono aoao faitulafono, e solitulafono e tusa o aiaiga o le faavae, o le tulafono sili lea ona maualuga a Samoa poo le supreme law.
O lea foi faaiuga ua talia ai le talosaga apili a Tuilaepa ma Lealailepule na lu’i ai se vaega o le faaiuga a le komiti na taofia ai o la totogi ma isi faamanuiaga.
Ua faatonuina le toe totogi uma atu o ia faamanuiaga.
O le tasi o vaega o le apili a le faipule o Lepa ma Faleata 3 ua talia, o se vaega o teuteuga o tulafono tumau na faasā pe tapu ai soo se sui faipule e faamalolo lē tumau, ona toe solia pe ulufale i le lotoā o le Palemene, ma taofi le talanoa faalauaitele i mataupu a le Palemene a o tuli le faasalaga.
Ua faatonuina e le faamasinoga o talosaga le totogi atu e le Fofoga Fetalai na faauluina le talosaga apili o le 5 afe tala mo le itu na faasaga iai le apili ma le 10 afe tala e totogi i le faamasinoga.
O le aotelega o suesuega a lea faamasinoga i le faaiuga a le faamasinoga maualuga na toe susue ai le lautusi atoa o aiaiga o le tulafono faavae, ma isi tulafono sa pulea ai lo tatou atunuu a o i lalo o pulega a Niu Sila talu mai le tausaga e 1947.
O ia foi sailiiliga a le faamasinoga o talosaga apili na silasila ai i tulafono tau Palemene a Peretania o loo fau ai tulafono a le Palemene o Samoa mai taimi o pulega a Niu Sila.
O le masina o Tesema o le tausaga na tea nei na tauaofia ai galuega a le faamsinoga o talosaga a le faamasinoga maualuga ma silasila ai i le mataupu i le talosaga apili mai le Fofoga Fetalai, na lui ai le faaiuga a le faamasinoga na faamuta ai le faamalolo lē tumau o le taitai o le Itu Agai o le faipule o Lepa ma le faipule o Faleata 3.
O le aoauli o le Aso Gafua le amataga o lenei vaiaso fou na faatoa tuuina mai ai le faaiuga e pei ona faamautu ai le faaiuga a le faamasinoga maualuga na fofogaina i le tausaga na tea nei.
