Ua faamautu aso o le feiloaiga a taitai o faigamalo e lua a Amerika Samoa ma Samoa Tutoatasi, le Atoa o Samoa, lea o le a usuia i Apia i lenei masina.
O le Aso Tofi ma le Aso Faraile, 13 ma le 14 o Oketopa o le a faia ai lea fonotaga tāua, o le a masii mai ai le Kovana Sili o le faigamalo i Sasa’e ma nisi o lana taupulega e faaauau i Samoa talanoaga na usuia muamua i Tutuila ma Manu’a i le masina o Aokuso.
O le uluai fono lea faavaomalo e lua talu ona filifilia le faigamalo fou a Amerika Samoa faapea foi le faigamalo fou a Samoa Tutoatasi.
O mataupu masani i talanoaga nei ua faaigoa nei o le Atoa o Samoa, o tulaga i le atiina a’e o le tamaoaiga o malo e lua, le itu i fefaatauaiga, ma femalaga’iga.
E iai le talitonuga o se isi o mataupu tāua i talanoaga o le a faia mai i Samoa Tutoatasi o avanoa faigaluega i le kamupani tuuapai’a o le Starkist.
