Ua mae’a le vaega muamua o taualumaga o le mataupu e faasino i le tagi a lē sa avea ma Loia Sili a le Malo lea o loo su ai e Savalenoa Mareva Betham-Annandale le ta’ita’i o le Malo, i le faamuta o lana auaunaga faa-Loia Sili i se auala faasolitulafono.

O le laasaga muamua ua ta’ua o le judiciary settlement in court e lei maua ai se tali, ma toe foi ai le mataupu e faatulaga se taimi e suesue auiliili ai le tagi e ala i le folasia o molimau.

Ua faailoa mai e se lesitala o le faamasinoga o le aso 24 ma le 25 o le masina nei o Iuni o le a suesueina ai le tagi a lē sa avea ma Loia Sili a le Malo, lea o loo ia finau e totogi atu se vaega o ana faamanuiaga tau totogi na te lei maua ona o le faamutaina o lona taimi galue i lana konekarate e 3 tausaga.

E $650,000 lea vaegatupe o loo finauina i le tagi a Savalenoa Mareva Betham-Annandale.

O le afioga i le tamaitai Palemia, Afioga Fiame Dr Naomi Mataafa o loo faatulaga o se tasi o molimau autu mo le itu a le Malo o loo faasaga iai le tagi. 

O se tasi o mataupu tau faamasinoga i finauga lava o le faamuta o le taimi galue i se gaioiga solitulafono, o le tagi lea a le afioga Fepuleai Attila Ropati, o loo faatūtū foi i le ta’ita’i o le Malo i le faamutaina o lona tofiga Pelesetene o le Faamasinoga o Fanua ma Suafa.

Ua mae’a ona suesueina mau o lea mataupu ma ua faatali nei i se faaiuga.

O se faamasino mai Niu Sila sa faatautaia lea faamasinoga, ma o se isi foi faamasino mai fafo o le a feagai ma le suesueina o le mataupu i le va o lē sa avea ma Loia Sili ma le ta’ita’i o le Malo le afioga i le Palemia.