Ua matuai le fiafia le toatele ma faia foi ni faamatalaga le manuia a nisi i se alii mai Melepone lea na ta’ua i se lipoti a le 9news i le aso ananafi ua tuuaia i lona viliina faatele o le telefoni a le triplle zero poo le 000 i totonu o le vaiaso e tasi.
E pei ona silafia o le numera lea e valaau ai mo fesoasoani faavavave e aofia ai leoleo, fuimu ma le taavale a le falemai ae fai mai leoleo i lea lipoti pei ona feta’ua’ina o le tagata lea e 73 tausaga le matua ma sa ia faaauau pea ona tavili le 000 ma pueina ai loa e leoleo mai lona fale i Skye Road i Frankston ina ua maua lelei i suesuega a leoleo le aufaasoesa i luga o telefoni ae leai ni mafuaaga tatau.
Sa molia ma toe tatala mai i tua ae toe maua foi e leoleo lipoti sa ia toe tavili foi isi telefoni faaopopo agai lava i le 000. O le taimi nei fai mai le lipoti ua toe tatala i tua ae toe tulai i le faamasinoga ia Ianuari o le tausaga fou.
O ituaiga tagata faapea lea o loo fautua soo mai ai leoleo ma auaunaga faafomai ina ia taumafai e faamama le latou avega ma ia faaaoga tatau foi le auaunaga, ae fai mai nisi, o ituaiga tagata faapea e lelei le faatau iai o ni meataalo e pei o tamaiti e faaalu ai o latou taimi nai lo le faalavelave i auaunaga tāua o loo manaomia e laveai ai soifua o tagata lautele o loo manaomia moni se fesoasoani.
