O le a manatua pea i tupulaga o nei aso ma tupulaga o Samoa o le lumanai, le tupe pepa fou $60 tala o le a amata maua i faletupe i le Aso Lulu 31 o Me, ona ua momoli ai le talaaga o faigamalo a Samoa mai le taimi o lona tutoatasi muamua, e oo mai i le aulia o le 60 tausaga.
O le uluai Palemia o Samoa le afioga i le tamaaiga, Fiame Mataafa Faumuina Mulinuu II ma lona alo tamaitai o le uluai Palemia tamaitai ua seei i le tofi i le aulia o le onosefulu tausaga, o o la ata ua i itu faailoa i le tupe pepa fou e faamanatu ai le 60 tausaga o le tatou malo tutoatasi.
O le tasi o matati’a ua faamauina i le tupe pepa fou, o tamaitai e toatolu ua aofia ai, e pei o le tamaitai Minisita o Tupe ma le tamaitai Kovana o le faletupe tutotonu ua saini o la suafa i le tupe pepa 60 tala ma le ata o le uluai tamaitai ua seei i le tofi Palemia o Samoa.
O le faalauiloaina o le tupe pepa 60 tala na saunoa iai le Minisita o Tupe, ma faaopoopo iai le tamaitai Palemia i le sauniga na faia i le faletalimalo o le Taumeasina i le afiafi o le Aso Faraile na tea nei.
Ni vaega o saunoaga mai le Minisita o Tupe le afioga Mulipola Anarosa Ale Molioo, ma le tamaitai Palemia afioga Fiame Naomi Mataafa.
