O itumalo faapalota muamua e 12 ua aofia ai itumalo e valu i Savaii ma le 4 i Upolu, o le a muamua maua le tai 150 afe tala o le tasi le miliona o le a faatino ai galuega o atinae mo le manuia o tagata o itumalo.

O itumalo ia ua faamautu nei maliega ma le Matagaluega o Tina ma Tamaitai Atinae o Afioaga ma Aga Fesootai ma le Matagaluega o Tupe a le malo o loo vaaia le poloketi lenei.

O le Aso Faraile na tea nei na faamautu ai sainigalima o le maliega i le va o ia matagaluega e lua ma sui faipule o itumalo e 12 faapea ma sui o komiti a o lei faia i le ogatotonu o le vaiaso nei le aoaoga e faamatalatala ai taiala o le faaaogaina o tupe.

O itumalo e 12 ua muamua mautu feagaiga ma sainia maliega mo le amata faamatuu iai o vaegatupe o le tasi le miliona tala, o Faasaleleaga Nu. 3, Gaga’emauga Nu. 1, Gaga’emauga Nu. 2, Faasaleleaga Nu. 4, Palauli Nu. 1, Palauli Nu. 2 ma Palauli Nu. 3 ma Falealupo.

I Upolu o itumalo faapalota o Vaimauga Nu. 2, Faleata Nu. 2, Falealili Nu. 1 ma Falealili Nu. 2.

Ua faaalia e le Minisita o tina ma tamaitai atinae o afioaga ma aga fesootai o loo vaaia le faagasologa o le poloketi ua faasopolia uma itumalo palota e 51 i tupe faavae tai 200 afe tala.

Peitai e na o le 12 itumalo lea ua mae’a tuuina atu faamatalaga o le faaaogaina o lea vaegatupe muamua e aofia ai ma faamatalaga ua mae’a sueina e le suetusi.

O isi itumalo e 39 o loo faatali le matagaluega ia latou lipoti ma le sueina o tusi i le faaaogaina o a latou 200 afe tala.

E faatoa sainia maliega ma faamautu feagaiga a ia itumalo mo le amata faamatuu iai o vaegatupe o le tasi le miliona pe a tuuina atu ia faamaumauga ma faamalieina foi le Malo i faamatalaga o le faaaogaina o seleni.