O le mae’a ona totogi o le tau na totoe o le masini fā’ata fou o le CT Scan e silia ma le 4 ma le ‘afa miliona tala Samoa, ua faamatuu mai ai e le kamupani Niu Sila na faatau mai ai le fā’ata le Code poo le faamatalaga e tatala faasoloatoa ai le faaaogaina o le masini fā’ata, e le auaunaga a le soifua maloloina, e aunoa ma le toe alu alu ma to’a lona faaaogaina.
Ua faailoa lea tulaga lelei e le Minisita o le Soifua Maloloina i le sauniga na tuu aloaia atu ai e le minisita o le faalapotopotoga o taui o faalavelave faafuasei na faatupeina le faatauina mai o le masini fā’ata CT Scan fou, lea na taunuu mai i le masina o Aokuso o le tausaga nei.
O le toe iai o lea masini fā’ata faaonaponei, o le a le toe aveina ai i Amerika Samoa ma Niu Sila ni gasegase e manaomia lea fā’ata. Ua taofia ai foi ma tupe alu faaopoopo a le Malo e ala mai i le matagaluega o le soifua maloloina, ina ua faaletonu le masini fā’ata CT Scan na aumai muamua, lea e ono tausaga o faaaoga ae tulai mai ai ni faaletonu ma amata ai ona toe ave i fafo gasegase e manaomia le sailia oo latou auga tau gasegase o le tino i le faaaoga o lea masini fā’ata.
Ni vaega o saunoaga mai le Minisita o le Soifua Maloloina le afioga Valasi Luapitofanua Toogamaga Tafito Selesele ma le Minisita o le faalapotopotoga o taui o faalavelave faafuasei tofa Leatinuu Wayne Sooialo i le tauaaoina atu o le masini fā’ata CT Scan fou.
O le masini na aumai muamua lea ua faaletonu, o loo faia galuega i le faapipiina o ona totoga ua faaletonu, ona faaleoleo lea mo taimi e feto’i ai le lelei o le masini fou ua faaaoga nei.
