Ua faamatala e le tina o si tama talavou e 16 tausaga lea na maliu i le fulū (flu) lona lē talitonu i le mea na tupu ma le vave o le maliu o si ana tama o se tagata malosi.
Lipotia i le RNZ le faamatalaga a le tina e suafa ia Rebecca Rollason e faapea na amata faalogoina e si ana tama le tiga o lona fa’aī tulou ma taletale mo ni nai aso talu mai le aso 11 o Iuni, lua aso mulimuli ane na ave ai e vaai le fomai ma faailoa ane ai o le flu ma ia faainu vai ma le faamatalaga afai e oo atu i le aso e sosoo ai o iai lava ni popolega ona toe agai atu lea, peitai o le aso na sosoo ai na uma ai le ola o si ana tama.
Fai mai le tina i le lipoti o loo faatali nei mo i’uga o su’esu’ega sa faia i si ana tama ma e matuā ona lē iloa le mea ua tupu.
O lana tama o se tagata malosi e sāaseā ma’i.
O William le igoa sa aoga i le Upper Hutt College.
Ua ta’ua foi i le lipoti lava lea o le masina o Fepuari e to’aono lelei tagata i le Whitianga Care Centre and Village na maliliu i totonu o se taimi puupuu ona o le pepesi o le Influenza A.
Puna o Faamatalaga: https://www.rnz.co.nz/news/national/520949/mum-of-16-year-old-upper-hutt-college-boy-who-died-at-home-within-days-of-flu-symptoms-in-disbelief-at-death
