O le mataupu 47 o le Tulafono Faavae ua faatāua e le Fofoga Fetalai i se faaiuga mo sui faipule o itumalo o Faleata 4 ma Siumu, o le tuuina atu lea i le Faamasinoga sili e maua ai se tali e pei ona fai mai ai lea vaega o le tulafono faavae.
O le feiloaiga na maua i le Fofoga Fetalai susuga Papalii Li’o Oloipola Ta’eu Masipa’u na ia faamanino atili ai lea tulaga, i le tuanai o lana faasilasilaga faalauaitele na ia faailoa ai, o lenei mataupu e maaleale ma faaeteete gata, ona o aiātatau o afioga i sui usufono le tofa Ale Vena Ale ma le tofa Tuu’u Anasii Leota ua faamavae mai le toe avea ma sui faipule e lagolagoina le vaega e puipuia aia tatau a tagata.
O le vaega 46 o le Faavae o loo faamatala manino mai ai o le taimi e faamavae ai se sui faipule mai se vaega faaupufai sa ia lagolagoina, o le taimi foi lea e faagafua pe avanoa ai le nofoa.
Peitai o le mataupu 47 o loo faatāua ai le tulaga auai o le avea ma sui usufono e faasino i le aiātatau e faatumauina ai le avea ma sui mamalu o le Palemene, o le tuuina atu lea i le faamasinoga.
Sa fesiligia foi le Fofoga Fetalai i sona finagalo, pe soli faavae pe leai teuteuga fou o le tulafono o faigapalota ua loka mau ai sui faipule i vaega faaupufai, ae avanoa le nofoa o le itumalo sa tauva ai pe a faamavae, ona ua le mafai foi ona see e avea ma faipule tutoatasi.
Le afioga i le Fofoga Fetalai susuga Papalii Li’o OIoipola Ta’eu Masipa’u.
