O le masina o Novema o le tausaga e 2019 na tupu ai se faalavelave tau taavale i se vaega o le alatele mai Leulumoega agai atu i Lefaga, ma maliu ai se taulealea 23 tausaga le matua, ae manu’a le isi taulealea.
O i laua nei sa aafia na malaga i le taavale sa aveina e Mikaele Maiava, ae o le tasi o taavale na aveina e se tamā sa umia le tofi Pulenuu o ia lea o Talosaga Faatagi.
Na faailoa e le loia a leoleo i le taimi na suesueina ai molimau e lagolago ai le tetee a i laua na faatautaia taavale na aafia i le faalavelave, sa faatamala tele le tulaga na faafoe ai taavale ona sa fai se tuuga i luga o le vaega o le alatele na tupu ai le faalavelave.
O le finauga a leoleo sa suesueina pe na mafua i se a ona tupu le faalavelave ma o le taunuuga o suesuega o molimau ua ioe ai le faamasinoga na faatamala ma leai se faautauta o le faafoeina o taavale e i laua na faafoeina, o le mafuaaga lena na tupu ai le faalavelave.
Ua lē mafai e leoleo ia latou mau na fofogaina i le faamasinoga ona faamaonia le moliaga o le fasioti tagata pa’ivalea na mafua ai le maliu mai le faalavelave tau taavale le motor manslaughter.
Ua faatali nei Mikaele Maiava ma Talosaga Faatagi i le aso o le a faatulaga mai e lau ai se faasalaga mo moliaga e luau a faamaonia.
Ua savalia nei le fā tausaga talu ona tupu le faalavelave, ae na faatoa suesueina molimau a leoleo i le masina o Iuni o le tausaga nei, ma le faaiuga ua taunuu iai lea na fofogaina i le masina o Oketopa ae faailoa i le masina nei o Tesema le faaiuga tusitusia.
