Ua faamaonia mai e le Moana Pasifika ma lipotia foi i le vaiaso nei e moni ua faamavae le alii faiaoga o le ‘au o Aaron Mauger.
O le faaiuga o le taamilosaga i le tausaga nei o le a faamae’a ai lona taimi i le ‘au.
E tolu tausaga le umi o lana konekarate sa sainia i le 2022 peitai e foliga o lea o le a vave agai ese.
E lei iai se taaloga ua malo a le Moana i le taamilosaga o loo faagasolo ma ua faamaonia e le taitaifono o le Moana Pasifika, Laauli Sir Michael Jones ua talia e le Fono Faatonu le faamavaega a Mauger ma faaaloalogia foi lana faaiuga e faamuamua si ona aiga.
E toe lua taaloga o totoe a le Moana i le taamilosaga o loo alu ma ua faaleo le agaga faafetai o le pulega ia Mauger i lona sao i le amatamataina o le ‘au ma sa faafetaia foi e Mauger le aulagolago a le Moana i vaiaso taitasi e ui e lei iai se malo i lenei tausaga ma o loo i le pito i lalo o le lisi o ‘au o le taamilosaga.
