O alii e to’alua na tuua’ia i lo la faapa’ū ifo o se piliki e 7kilokalama le mamafa i le ulu o se tagata sa taatia ua matapogia, ma faaauau ona la takiki le ulu o lenei tagata, ua sao mai i laua i le moliaga o le fasioti tagata faamoemoeina poo le murder, ae ua faamaonia lo la moliaga o le fasioti tagata pa’ivalea poo le manslaughter.
O alii e toalua o Isaac Ramese-Stanley ma Simon Tavita, o lea ua faamaonia nei o la moliaga e pei ona maliu ai le alii o Nigel Fuatimu e 21 tausaga, i se faalavelave na tulai mai i le Jellicoe Park i Manurewa i le aso 3 o Oketopa i le 2020.
E lei atoa se fa itula na faatalanoa ai e le vasega o faatonu le latou faaiuga i lenei mataupu i le Aso Faraile talu ai, ae aumai ai ai loa i le aso ananafi le latou iuga ua oo i ai, e pei ona fofogaina i le Faamasinoga Maualuga i Aukilani i le aso ananafi, Aso Gafua, 12 o Setema 2022.
Ua faamaonia foi le moliaga o le faaoolima ma le faamoemoe ia faaoo ni manu’a, o le alii o Kitiona Stanely, e pei ona iai foi o ia iina i le Jellicoe Park i Manurewa i le aso na tulai mai ai lenei faalavelave ua ma’umau ai le soifua talavou o le alii o Nigel Fuatimu.
Na molimauina le tumutumu o le fale faamasino i le aso ananafi i uo ma aiga o le alii o Nigel Fuatimu, o le toatele o i latou sa ofuina atu o latou mitiafu o loo lolomi ai le ata ma ni faaupuga o moomooga e aualofa ai ia Nigel, a latou faatalitalia le lauina mai o le faaiuga.
O le faalavelave lenei na tulai mai i le Jellicoe Park i Manurewa, ina ua osofaia faafuasei e i latou ua molia, le alii o Nigel Fuatimu ma ni ana uo a o nofonofo ai iina i le paka ma tātā faaleotele sa latou laau o musika Samoa i le tusa o le 11pm i le po o le aso 3 Oketopa 2020.
E tusa o folasaga a loia a leoleo i lenei mataupu, na oo atu Ramese-Stanley ma Tavita ma amata ona faavevesi le tafaoga a Nigel ma ana uo, ma faatonu e faaleo laititi le latou laau, ma amata ona tau’ai atu i atigifagu, ma tulai mai ai loa le vevesi lea na mafua ai le maliu o Fuatimu.
O loo taofia pea la i le vaaiga a leoleo alii o Ramese-Stanley ma Tavita e faatali ai le lauina o la faasalaga i le masina fou. Mo Kitiona Stanley, ua tatala i tua i lalo o tuutuuga, e faatali ai le lauina o lona faasalaga i le aso lava lea i le masina fou.
