O se alo o Samoa, le tamaitai foma’i o Dr Teuila Percival na ia maua le faailoga taualoa o le Dame Grand Companion of NZ Order of Merit i le faailogaina o le aso soifua o le Tupu o Peretania mo le tausaga lenei 2023, mo ana auaunaga tau le soifua maloloina mo tagata Pasefika.
O Dr Percival o ia le uluai paediatrician Samoa poo le foma’i Samoa mo ma’i o tamaiti i Niu Sila e pei ona faailoa e le One News ma ua silia ma le 30 tausaga o lana auaunaga i Aukilani i Saute.
O Dr Teuila Percival o ia o se sui faavae ma o le Sui Taitaifono a le South Seas Healthcare, ma amata mai lana tautua mo le tausia o le soifua maloloina o tagata Pasefika i Aukilani talu mai le 1999.
O ia foi o se sui faavae o le Asosi a Foma’i Pasefika i Niu Sila nei.
Sa mauaina foi e le tamaitai o Jacinda Ardern o lē sa avea ma Palemia o Niu Sila, le faailoga taualoa o le Dame Grand Companion of NZ Order of Merit i le faailogaina o le aso soifua o le Tupu o Peretania mo le tausaga lenei 2023.
O Ardern 37 tausaga o lona soifua o le taitai aupito i talavou lea o le Leipa na tulai mai i le 2017.
O le alii faiaoga o le lakapi Wayne Smith ua avea ma Knight ona o ana auaunaga i le taaloga lakapi.
E anoanoai isi ua maua foi faamanuiaga ia e pei foi o tamaitai o le Black Ferns o Ruahei Demant ma le sui ole White Ferns o Amy Satterthwaite ua mauaina le faailoga o le Members of the NZ Order of Merit.
