O le sosaiete lenei ua faaigoaina o le Tufa le Taleni na faavae mai i le tausaga 2021 i le na o le toafā tina na faatuina a latou pisinisi i le maketi i Savalalo e faatau ai a latou oloa gaosi.
O le aso ananafi na faatino ai le tufatufaina o faailoga mo tina na auai i se tasi o aoaoga e faasoa ai tomai ma agavaa foi o lenei sosaiete auā le fesoasoani ia faaaogāina taleni ua maua e tausia ai aiga i faiva alofilima o loo latou faatinoina e pei o le suisui, valiina o ie lavalava, lalagaina o meataulima ma nisi.
Saunoa le Peresetene o le sosaiete ia Folola Tautai Silila i taleni ua mafai ona faasoa atu i nisi o tina o loo fia manaomia lenei fesoasoani.
“O le sosaiete lenei sa faavaeina mai i le maketi i Savalalo lea ua talaina i lalo, o matou a la ma nai tina e toafā sa amataina le polokalame lenei ona matou o lea e resitala foi la matou vaega ma amata mai ai iina le atinaeina.
“E fai lava si toatele o nai tagata foi na mananao e auai i lenei polokalame ona matou tilotilo lea i le auina mai o i latou e iai nisi tomai ma agavaa e fesoasoani e aoaoina nisi tomai auā o le auga tonu lena o le sosaiete lenei e faasoa ma faatuputeleina taleni ia aua le taofimau afai ua iai le taleni ia e alofa e faasoa.
“E pei ona iai le autu ia i matou o le taumafai lea ia tineia le tulaga lea o le ola mativa ma le lē tagolima i totonu o aiga ae ia aogā nei polokalame e fesoasoani ai i tina aemaise lava i tina ia mafai ona ia atinae se taleni ua ia maua mai i lenei polokalame e avagalima ai lona aiga ma fesoasoani ai i le tausiga.”
O loo agai i nuu ma afioaga lenei polokalame e pei ona ta’ua e Silila ua mae’a asia Lefaga ma faatino ai se isi polokalame.
“E 30 tina ma tamaitai sa auai ai i lea foi polokalame o i latou nei e le o iai ni galuega sa aoaoina uma i lea vaega, ma o le taimi la lenei ua silia ma le 100 tina ua mafai ona auai ia matou polokalame ona o le tulaga lava o le fia maua o se tomai foi i le gaosiga o nei faiva alofilima e tua iai le aiga.”
O loo iai le faamoemoe o se taimi o i luma ona mafai lea ona oo atu lenei polokalame i le motu tele i Salafai e faasoa ai foi lenei polokalame auā le fesoasoani lea i aiga o loo manaomia.
