I le mae’a o le iva vaiaso sa a’oa’oina ai i Niu Sila le susuga i le alii leoleo o John Bosco Sala, ua taliu mai nei i Samoa o se tasi o malu o le malo ua umia tomai a’oa’oina i le faatonutonuina ma le vaaia o taifau sosogi, o loo sailia fualaau ma pauta faasāina, faapea isi gaioiga solitulafono e manaomia ai lea auaunaga.
O ia o se tasi o leoleo mai le Pasefika ua a’oa’oina i le vaega o leoleo i Niu Sila o loo a’oa’o ai tomai i le faaaogāina o taifau sosogi ma o se faaeaea lea i le auaunaga a le matagaluega o leoleo, falepuipui ma le ola toefuata’ina, ua iai se isi Malu o le Malo na te faafoeina lea galuega tāua.
E toatolu leoleo mai le Pasefika e aofia ai le susuga i le Malu o le Malo ia John Bosco Sala ua faauu ma maua le tomai mai lea a’oa’oga.
E pei ona silafia o le faaaogāina o taifau sosogi e leoleo ma le vaega o le tiute, o nisi ia o fesoasoani malosi i le sailia o fualaau ma pauta faasāina faapea isi gaioiga solitulafono e ono lamatia ai le saogalemu o tuaoi o Samoa.
