E 44 tausaga le matua o le tina na tatui (tulou) ananafi i luga o le auala i Aukilani.
O le matua lea o le tina ua faamaonia mai e leoleo ma e faapea e tigaina ona manuaga i le pito i luga o lona tino, ma e tuufaatasia tala o le taeao o loo faasolosolo manuia o iai i le falemai.
O luga o le auala i New Lynn i le itu i Sisifo o Aukilani lea na tupu ai, ma i molimau o se misa a lē ua faamanualia ma le tama na tatui ai loa ma taatia ai le tino o le tina i le ogatotonu o le auala.
O se tasi e faigaluega i lea itu na fesoasoani ane i le tina ma valaau leoleo.
I lipoti a leoleo o loo faamatalaina ai o se faamanualia e mafua mai i se feeseeseaiga, ma ua faamautinoa mai ai foi i tagata lautele e le o iai se tulaga e faapopoleina ai lo latou saogalemu ma o lea foi ua molia le alii 26 tausaga i moliaga o le faaoomanua.
