O le tea o le itula e lima i le afiafi ananafi lea na osofaia ai e le augaoi le Sparkles Jewellers o loo i le Great South Road, ma i ata na maua mai o loo iloa ai le matuai faaleagaina o kapeneta, faitotoa ma le tele o tioata taei.
O le sikulati ua faamanu’alia e faapea o ona fofoga ma o le samala lea na faaaoga e se tasi o le augaoi, ma o ia lea faatoa 3 masina talu ona faafaigaluega e le aiga e ana le pisinisi aua lava le puipuiga o le faleoloa mai gaoi.
E toalima le au gaoi na o i totonu o le faleoloa ae o le isi toatasi na faatali atu i le taavale, ma mai le leoleo anapo e leai se isi ua molia ma o loo faia suesuega.
Ae mai se tasi o faauo a le aiga e ana le pisinisi, e iai lona talitonuga o lea lava na feofeoai le augaoi i lo latou pitonuu e sue se faleoloa e gaoi.
O Papatoetoe o lona taimi pisi lava lenei i faatauga ona o le Diwali, ma o le faleoloa na gaoia e faapea sa matuai pisi i faatauga o ananafi.
