Faamanino e le SVSG auala na faaaoga iai tupe na tuuina atu e le malo

O tupe na tuuina atu e le Malo i le SVSG, lea na manuia ai lana polokalame lona lua o a latou galuega faatino e ono, o le poloketi, o le “Eliminating Violence Against Women and Girls” poo le tafiesea o sauaga i tina ma tamaitai. 

O le galuega faatino lona lua lea, na amata mai ia Aperila ia Tesema o le 2022, na tulimata’ia ai alii e iai tofiga i totonu o nuu na fili, e aofia ai Matautu Falealili, Saleapaga, Lalomauga, Fusi Safata, Faleatiu, Vaipu’a, ma Avao.

O le sootaga ma galuega faatino a le Toomaga i nuu nei e fitu, na tutusi ai ni Taiala faapitoa lava mo latou nuu. 

Ma ua mae’a ai nei lena galuega a taitai o nuu, o le Tusi Taiala, e mulimulitaia ai le tausiga o le filemu i aiga ma afioaga. 

E le gata o le Taiala, ae ua tapena foi ma a latou folafolaga faamauina, e galulue ma tausisia ai le Taiala. 

O le isi vaega o lena Taiala, e aofia ai laupapa, o loo tusia ai folafolaga faalauiloa, ma faatutu i tafa ala o na afioaga. 

Ma ua toe iloilo ai foi a latou tulafono fai, e mulimulitaia ai lava a latou Tusi Taiala. 

Peitai e le gata ina faaaoga ai taitai alii mai nuu, ua iloa ai foi e le Toomaga poo le SVSG le tāua o le aoaoina o tupulaga tama ma avea ai o nisi avefeau i le taua o faia nei, o le aveesea o sauaga faasaga i tamaitai. 

O le faaiuga o lenei taumafaiga, e aofia ai tama aoga mai kolisi e ono i le atunuu, le Seventh Day Adventist, Don Bosco i Alafua, Chanel College, Maluafou College, Wesley College ma le Tuasivi College , i le faia o a latou ata e faaali ai feau tāua o loo momoli atu ai le taofia nei loa o sauaga i tamaitai. 

O na ata, ua taape ai i luga o fesootaiga televavave mo le faaauau ai pea o faalauiloa. 

1. Kolisi a le Aso Fitu: Ia fai atu i isi e pei ona e manao e fai mai e isi ia te oe. Ua faatāua ai le fetaua’i o tagata ma le faailoga tagata. 
2. Don Bosco i Alafua: O le toe faaolaola o le aganuu, faaaloalo, e aveesea ai sauaga faasaga i tamaitai. Faatatau i alii, ia o latou faaaloalo i tamaitai.
3. Chanel College: Aveese ae tuu i le Atua e na te foia, o fesouaiga ma le soifua lelei o le mafaufau.
4. Maluafou College: E te mafai ona e tuli ese sauaga ma oe, poo le tautala ae le o lou nofonofo e te le pisa ona o lou fefe. 
5. Wesley College: E tatou te tutu faatasi, i lou fesoasoani atu i isi, poo le faamalosiau i au uo.
6. Tuasivi College: O le bully poo le taufaamatau e leai sona avanoa i totonu o le Kolisi o Tuasivi. Bullying has no place in Tuasivi College.

O le galuega faifaatasi a le Toomaga ma le atunuu, le taofia o sauaga faasaga i tamaitai.