Ua faamuta le salalau o tala tuu mumusu ma tala o le ualesi mosooi i se vaa mai Saina o loo taula i le uafu i Satitoa i Aleipata, ina ua faailoa ai e le Pulega o Uafu o lea vaa ua uma ona iai le faatagana a matagaluega o le Malo e fitoitonu ma auaunaga e aofia ai le pulega o uafu, pulega o vaa ma le vaega o femalagaa’iga i le matagaluega a le Palemia ma le Kapeneta.
O le kamupani o le China Habour o loo eliina le maa mai auvae mauga o le afioaga o Fagalii o latou ia e ana le vaa o loo aumai ai nisi o masini ma totoga o lea galuega tele o loo tanu ai le uafu i Matautu i Apia.
Ua faailoa e le pulega o uafu i se lipoti le leai o se avanoa e taula ai le vaa i le uafu i Apia o le mafuaaga lea o le ave o le vaa i le uafu i Satitoa.
O le nofoaga foi lea o loo agai iai loli tetele a le kamupani o le China Habour mo le la’uina mai o a latou meafaigaluega ma masini ma isi totoga manaomia mo le vili maa a lea kamupani mai Saina o loo faagaioia i tuāmaota o Laulii.
E umi ni tausaga o le galuega o le vili maa a le China Habour o loo faatino i ni eleele o lea afioaga o le itumalo o le Vaimauga.
