I le feiloaiga a le Tamaitai Palemia ma le vasega o Tusitala i le aoauli nei na ia faamanino mataupu sa lāgā mai i le lipoti a le atunuu agai i le Mālō Aufaatasi i tulaga tau aiā tatau o tagata. 

E tolu mataupu na faailoa e le afioga Fiame Naomi Mataafa ma lagagā i ia talanoaga e aofia ai le taupulein lea le faamuta o le soifua o le tagata i se auala aloaia pe ua iai le pule i le tagata pe fesoasoani ai foi fomai poo le euthanasia i le gagana faaperetania. Na faamanino e le tamaitai Palemia e le’o se mataupu na lāgā atu e Samoa ae o mataupu na talanoaina i le li’o o saofaiga o le Mālō aufaatasi.

E aofia ai la ma le mataupu na tulai mai ai se feeders saiga o manatu i le Mālō Aufaatasi ma sui faipule o le Palemene i le faamuta ai o maitaga poo le abortion ma le mataupu lona tolu o faaipoipoga i ituaiga tutusa (gay marriages).

Taua e Fiame “O mataupu uma nei ua faamanino e le tamaitai Palemia e le’o ni mataupu e tauaveina e le Mālō poo momoli atu e Samoa ona o loo iai ni manaoga i itu nei, ae o mataupu o loo aumai e lipoti a le Mālō Aufaatasi o ni mataupu o loo lagalāgā e isi ona sui auai poo isi atunuu ma o ni mataupu o loo tauaveina e i latou”.

O le naunautaiga a le tamaitai Palemia ina nei ave seseina mafaufau o le atunuu i ni mataupu e faapea o ni mataupu nei ua mananao ai Samoa ae leai e le’o le tulaga lea.

Ma o le pinefaamau o nei vaega o loo taatitia pea tulafono a Samoa e tusa ai ma mataupu nei ma o aiā tatau faavae a le tagata soifua o loo malu puipuia i lalo o tulafono a le atunuu.