Ua maitauina le tele o Matagaluega ma Pulega i Samoa ua amata galuega ma faalauiloa mo le Aso mo Tamaitai o le Lalolagi le “International Women’s Day”
O loo molimauina le faatino ai o saafiafiga mo faauluuluga ma tamaitai faigaluega o Matagaluega eseese.
E aofia ai le Pulega o le Malosiaga Faaeletise (EPC), Faalapotopotoga Inisiua tau Soifua a Samoa (SLAC), o le Pulega o Felauaiga i le Laueleele (LTA), faapea le Matagaluega o Leoleo, Falepuipui ma le Toefuata’iga ma le tele o Matagaluega a le malo.
I se faatalatalanoaga i luga o upega tafailagi a le Sui Komesina o Leoleo, le susuga Papalii Monalisa Tia’i-Keti na ia ta’ua ai le tāua o lenei aso, e faamanatu ai le agavaa ma le tautiga o tamaitai auā le tautuaina o le atunuu.
Mo le autu o lea aso faapitoa “Inspiring inclusion”, na faasoa Papalii o se autu tāua, ma i lona galue ai i le Matagaluega o Leoleo, o lana faamalosiau i tamaitai e auai mai i le galuega, e ui e tele faafitauli i le galuega ae o lea lava e maitauina le telē o le sao o tamaitai i le galuega ma le malo.
O le Aso Faraile nei, 8 o Mati e faamanatu ai le Aso mo Tamaitai ma e faatautaia pea i tausaga taitasi.
