O le gagana Samoa o le gagana lona tolu lea aupito taatele lona faaaogaina i totonu o Niu Sila, mulimuli ane i tua o le gagana Peretania ma le gagana Te Reo Maori ae o le gagana lona lua e aupito tautalagia e tagata i Aukilani.
O vaega ia sa afea i le saunoaga a le minisita o Tagata Pasefika, Barbara Edmonds i le amata ai o sauniga faamanatu o lenei vaiaso tāua i totonu o Niu Sila.
Fai mai le minisita o tagata Samoa e tusa lea ma le 47.9 pasene lo latou faitau aofai i tagata Pasefika uma i le atunuu ma o loo faatupulaia pea lea numera.
O le ‘au’au o lenei tausaga mo le vaiaso o le gagana Samoa, “Mitamita i lau Gagana, Maua’a lou Faasinomaga” ma ua faailoa e le minisita ua iai polokalame eseese ua faatulaga e aofia ai polokalame e faia i luga o upega tafailagi, leitio Pasefika, polokalame i aoga ma isi.
Ua unaia ai e le tamaitai minisita tagata uma ina ia faatāua le gagana Samoa.
O le vaiaso na amata faamamalu mai le aso ananafi, aso 28 o Me seia oo i le aso 3 o Iuni.
