O se tasi lea o vaega sa agai ai faatalanoaga a le Ofisa Sili o Pulega a le Matagaluega o Aoga Taaloga ma Aganuu, Aeau Chris Hazelman ma Ulu Aoga o Kolisi i le atunuu i la latou fonotaga i le vaiaso nei.

Na ta’ua ai e Aeau o se tasi lenei o vaega sa oo iai le fonotaga o le tulaga i lipoti e tusa ai ma le meaalofa tupe a le Malo poo le One Grant Scheme lea e tusa ma le 17.7 miliona e faasafua mo aoga i le atunuu.

“O le faamalosiau lava i nai Ulu Aoga ia vave ona tapena mai tala i le tupe i le One Government Grant lea ua pasia e le Malo.

“E mo’i ua iai le siitaga mai le Malo i lenei meaalofa, o le tele o le tupe tuuina mai o le tele foi lena o le silasila mai a le Malo poo ā mai totonu o lipoti.

“O le toe faamanatu na ia tatou Ulu Aoga faamolemole se’i toe silasila toto’a lava i lea vaega.

“Ma toe faamanatu ai foi le faaaoga tatau o lenei fesoasoani ua tatau ona usitaia aiaiga o loo faapena ona aumai e le Malo.

“E iai foi taimi e aumai ai talosaga a nai Ulu Aoga poo specific request ua mae’a ona faamalamalama iai auala e tatau ona uia mo talosaga tuuina mai.

“Ae o le naunautaiga lava ia a le Matagaluega ia fesoasoani ma faamāmā avega i nai aoga.

“O vaega masani lava e toe faamanatu ai le vasega o Ulu Aoga nisi o vaega tāua i la latou pitolaau tauave.”

Ta’ua e Aeau o se avanoa tāua tele lea i feiloaiga faapenei e fefaasoaa’i ai le Matagaluega ma Ulu Aoga i vaega e ao ona faaleleia ai le auaunaga i alo ma fanau.