O le taeao analeila na auai ai le Palemia, Afioga Fiame Naomi Mataafa i le faamanatuina o se tasi o ituaiga gaioiga e pei o se faamalositino poo le yoga.

Na saunoa Fiame o Samoa o le uluai atunuu o le lalolagi ua faamanatuina lenei aso i lenei tausaga.

“O nei aso faavaomalo o ni faamoemoega e aoaoina ai le mamalu lautele o tagata i mataupu o loo fai ma popolega, o le folasia lea o nisi o faafitauli o loo feagai ma le lalolagi aemaise ai o le faamanatu lea o ni fuafuaga ua ausia e o tatou tagata.”

O loo agai pea i luga le fuainumera o faama’i lē pipisi e pei o le gasegase o le fatu, ma’i suka o gasegase e aafia ai le manava ma le kanesa.

“O le 74 pasene o i latou e maliliu i le lalolagi e mafua mai i nei faama’i ma o Samoa le isi atunuu o loo aafia ai.

“O loo maitauina pea e le Malo le maualuga o le fuainumera o tupulaga laiti o loo moomia le ave faatopetope i atunuu i fafo mo taotoga mo nei faama’i.

“O loo fai foi ma popolega o le Malo le tulaga o le gafataulimaina o taotoga ma sailigafofo o nei faama’i.”

Na ta’ua ai e Fiame o loo tilotilo i le tuuitiitia ai o le tau o nei siaki ma taotoga i nei faama’i e o faatasi ai ma le galulue faatasi ina ia maua se Samoa soifua maloloina lelei.

“O loo taulogologo mai pea le Faalapotopotoga a le Soifua Maloloina i le Lalolagi ina ia tuuitiitia ai le lē naunau o tagata e faatino faamalositino lea o loo agiagia ai i mafuaaga o le vave uma ai o soifua o le toatele.”

O le yoga o se vaega tāua lea i le aganuu a Initia e pei ona faafetaia ai le Palemia.

“O lou manatu e ese ma le tāua o lenei ituaiga faamalositino ma e faamalo atu ai i le faalapotopotoga foi o tagatanuu Initia i totonu o Samoa mo le unaia o lenei foi gaioiga e pei ona tuuina mai a e Malo Aufaatasi le tāua i o tatou tagata i le faia lea o filifiliga tatau i o tatou soifua maloloina.”

O lenei faamoemoe na faatino i lumāmaota o le Malo.