O le faamoemoe lenei na faataunuuina i le taeao nei i Malifa ma na auai nisi o sui mai Matagaluega a le Malo faapea ai nisi o aoga tulagalua ma Kolisi e molimauina le tāua o lenei aso faapitoa i le lalolagi.
Saunoa le Minisita o Aoga, Afioga Seiula Ioane Tuaau i le faatāuaina e le vaega o Aoaoga lenei aso tāua.
“O le 10 ai nei o tausaga talu ona faamanatuina lenei aso tāua e si o tatou atunuu e tauala mai i le Matagaluega o Aoga Taaloga ma Aganuu.
“O le autu o lenei aso faamanatu, o faamatalaga i le asō, o le talafaasolopito mo a taeao lea o loo laualuga ai le teumaluina ma puipuia faamaumauga i se atunuu e fai lea ma punavai e utuvai ai tagatanuu.
“E fesoasoani tele lenei auaunaga ia tatou fanau aoga auā o faamaumauga nei e tua iai fanau i sailiiliga eseese aemaise nisi e moomia.
“E le gata i o tatou lava tagata, ae ua faapena foi i latou o loo autovaa mai i itu e fā o le lalolagi.”
Na faaopoopo i le saunoaga a le Minisita e ao lava ona galulue faatasi ma lana faamalosi ia i latou o loo galulue i lenei matata.
“O le mea moni, ua tele nisi o faamaumauga tāua o loo manaomia pea i aso nei ae peitai sa le mafai ona faamaumau i na aso ma ua mou atu ai ma nisi o vaega tāua.
“Ae o le faamanatu ma le feau o lenei faamoemoe ia tatou maua le agaga mulumulu aufoe e atina’e ai lea vaega tāua mo le manuia o le atunuu i lona aotelega.
“Auā a malupuipuia faamaumauga o le asō, e le taumate o le a manino atoatoa lo tatou talafaasolopito o a taeao.”
