O agavaa ma tomai e avea ai se tamaitai ma taitai lelei ma tausaafia, o se vaega taua lea o le faasoa a tamaitai e toasefulu o le a sailia ai se Tausala o Samoa ma le tamaitai Komesina maualuga o le sui o le Malo Ausetalia i Samoa o Emily Luck.
O le aso Tofi na talimalo ai le Komesina maualuga o lea Malo i tamaitai tauva ise taumafataga o le aoauli i lona maota i Tiapapata ile agai lea i Tiavi ma Afiamalu.
O se tali faaaloalo na avea foi ma avanoa e faasoa ane ai nisi o tamaitai o le atunuu sa tauaveina le pale o le Tausala o Samoa i tausaga ua mavae, le tamaitai susuga Papalii Alexandra Iakopo Ah Tong, ma Taii Cheri Robinson Moors.
O lea mafutaga na faailoa ai e le sui o le Malo o Ausetalia ilo tatou atunuu se foai e 10 afe tala, ua faaauala mai ise polokalame fesoasoani a le ofisa o le Malo Ausetalia o le a maua e le Tausala o le a manumalo e faatino ai poloketi mo le manuia o tagata lautele.
E manino mai i le foai lenei ose tasi lea o foai o le a aofia i faailoga mo le tausala o le a manumalo.
