Ua atoa i le vaiaso lenei le masina talu ona amata fausia se taiala e faatulaga ai polokalame o galuega e Puipuia ai tinā ma tamaitai o le atunuu mai sauaga eseese mo le isi 10 tausaga o lumanai.
Na saunoa aloaia ai le Minisita o Tina ma Tamaitai Leota Lamositele Sio ma faapea o sauaga o se faafitauli ua leva ona tupu ma sa tauave mai foi e faigamalo ua mavae taumafaiga e faaititia ai sauaga eseese.
Saunoa foi Leota i le ripoti o suesuega na faia i le tausaga e 2000 na iloa ai e 46% o tina ma tamaitai sa sauaina i totonu aiga.
Peitai i le isi suesuega i le tausaga e 2017 e 60% tulaga siitia o sauaga i tinā ma tamaitai Samoa.
O le tausaga e 2018 na lipotia ai e le Ofisa o sulufaiga o le 87% o tinā sa faatalanoa ma aafia i sauaga o le faamata’u (threat) ae 86% na aafia i sauaga patino ma le 9.5% na faatalanoa sa aafia i faiga aiga faamalosi o se tagata lava e aiga iai.
Na taua e le Minisita a faatupe galuega sa taumafai mai ai e faaititia sauaga i Samoa e i le va o le $98 i le $132 miliona tala i le tausaga poo le 6.7% o le tau atoa o le tamaoaiga o Samoa. O se tau maoa’e ae o loo agai pea i luga tulaga tūga o lea faaletonu.
E ui i lea o le a toe taumafai le Mālō e faatalanoa galuega ua fuafua ia faaititia ma faamuta nei sauaga i tina ma tamaitai i lalo o le taitaiga a le Matagaluega o Tina ma Tamaitai ma faapaaga ma Malo Aufaatasi i lana polokalame o le Spotlight Initiative.
