Ua pipisi le faamai misela i Amerika Samoa ma ua amata faamalosia ai nei fautuaga a le soifua maloloina i Samoa Tutoatasi mo tagata malaga uma mai le teritori e ulufale ilo tatou atunuu.
O le travel advice poo le fautuaga mo femalagaiga ua aumai faalauaitele e le matagaluega o le soifua maloloina ma ua saini ai le aao o le Faatonu Sili Aoao, le susuga Aiono Dr Alec Ekeroma, o loo aiaia ai le tatau i tagata malaga uma mai le teritori e aofia ai fanau iti ma fanau mai le 6 i le 15 masina le matutua ona fai tuipuipui muamua o le misela, rubella ma le mummy a o lei ulufale mai.
O fanau mai le matutua o le 15 masina ma le 24 masina e tatau ona mae’a tuipuipui e lua o le misela ona faatoa mafai lea ona ulufale i Samoa.
O tagata malaga uma foi e aofia ai fanau mai le teritori e tatau ona fai tuipuipui i totonu o le 14 aso, ao lei malaga mai i Samoa Tutoatasi.
O i latou uma e le tausisia nei aiaiga, e le mafai ona malaga mai i le vaalele poo le vaa a lalo, ae afai e mafai ona malaga mai i lo tatou atunuu ae maua i le malaevaalele e le o faamalieina uma aiaiga, e le faatagaina ona ulufale i Samoa.
O tagata malaga uma foi e tatau ona umia pepa o faamaumauga mai le matagaluega o le soifua maloloina i Amerika Samoa e faamaonia ai ua maea ona fai tuipuipui o le misela.
O isi tagata malaga uma e ulufale mai i le atunuu ua faamalosia le faia o puni fofoga pe a taunuu ma o se puipuiga tāua tele lea e taofia ai le pipisi o le misela.
E tatau foi ona usitaia le faia o le suega faafomai e faaaogā ai puisu se’i tulou, poo le nasal test.
O tagata uma e malaga mai ae o aafia i auga o le fiva, matutu le tale, mūmū mata, tafe le isu, pata le tino amata mai i le ulu e oo i tamatamai vae, le manogi se taumafa lona uiga e le fia tausami, e tatau ona logo le vaega o fomai ma tausi soifua a le soifua maloloina i le malaevaalele pe a taunuu.
O le a maua se finagalo o le pulega o le auaunaga a le soifua maloloina e tusa ai o tapenaga i puipuiga o le atunuu, i se feiloaiga ua taloina mai ma le vasega o le au tusitala.
