Ua faamālōlō lē tumau nei se loia e suafa Nicholas Wintour, mai le faaauau ai ona faatino o ana galuega faaloia, ina ua faamaonia e le Komiti o iloiloga o Tu ma Aga Taualoa a Loia le Lawyers and Conveyancers Disciplinary Tribunal, moliaga o lona solia o aiaiga ma ta’iala, ma aga taualoa o le avea ai ma se loia.
I lipoti mai le leitio faavaomalo a Niu Sila, na faaaogā e Wintour lona tulaga loia e maua ai faamatalaga e uiga i ni matāupu sa aafia ai lona tuaoi i le tulafono, ma le faamoemoe e taumafai e ave’ese faamalosi ai le tuaoi ma lona aiga, mai lo latou fale.
Ua lipotia e mafua mai ona o se feeseesea’iga a le loia ma le tuaoi i le auala taavale poo le driveway.
Ta’ua foi i lipoti, o le tasi o itu na mautū ai le faai’uga a le komiti, o le faamaonia ai le lē maumaututū o mau a Wintour i taimi e faasolo ai iloiloga o le matāupu, i le fesiligia ai i auala na maua ai e ia faamatalaga ma faamaumauga e faatatau i lona tuaoi.
O le tasi o ana mau na ia faapea ai, na maua ana faamaumauga mai i leoleo, sa aga’i atu i lona fale ina ua ia faaulu sana faaseā faasaga i lē o loo aafia.
Na sui le mau a le alii loia, ma faapea atu i le komiti, o lana faauō e galue i le ofisa o faamasinoga na maua ai ana faamaumauga, ina ua fesiligia na ia faailoa ane ua maliu lea faauō.
E le’i uma ai iinā le fesuisuia’i o mau a le alii o Nicholas Wintour i le komiti.
Na ia faamatala o le taimi na faia ai se feiloa’iga ae o se soalaupulega ma lē e vaaia le nofoaga ma le fanua o loo latou aumau ai na faailoa atu ai e lea tagata faamatalaga ia te ia.
Ma i le fesuisuia’i ai o mau a le loia na faamaonia ai e le Komiti, e lē moni faamatalaga a le alii loia, ma ua pelogia le Wintour le Sosaiete o Loia i auala na ia faaaogā e maua ai ia faamatalaga mo le lata i le fitu tausaga.
Mai iloiloga a le Komiti, o loo o latou masalomia, na maua faamatalaga a le alii o Nicholas mai se tasi o loo galue i le faamasinoga faaitumalo o Aukilani.
Puna o Faamatalaga: https://www.rnz.co.nz/news/national/560303/auckland-lawyer-nicholas-wintour-used-neighbour-s-criminal-history-to-try-to-get-him-evicted
