E fā vaiaso le umi ua faamālōlō lē tumau ai le ofisa sinia o le ofisa o le sooupu o le malo le afioga Nanai Laveitiga Tuiletufuga, e māfua i le sesē o le faasalalauga mai le ofisa sooupu na faailoa ai le filifiliga a le Kapeneta o le Ofisa Sili poo le Faatonu Sili aoao o le matāgaluega o le soifua mālōlōina.
E pei ona silafia na aumai faalaua’itele se faamālūlūga a le ofisa sooupu i le sesē o le faasalalauga, ma toe faasa’o ai le tagata tonu na filifili le tama’ita’i tausi soifua sinia o June Scanlan Lui.
O le feiloa’iga a le Palemia ma tusitala i le Aso Faraile ua mavae na faailoa ai le faamālōlō lē tumau o le ofisa sinia o le ofisa sooupu ma faailoa ai foi ma le su’esu’ega ua faia e le komisi e pulea tagata faigaluega a le malo.
O le su’esu’ega lea o le a iloa ai poo fea na māfua ai le faaletonu i le sesē na tula’i mai, ae mo le fā vaiaso o loo faamālōlō lē tumau ai le ofisa sinia, o loo maua lona totogi e tusa o aiaiga masani, ae faato’ā taofi le maua o le totogi pe a faaumiumi le su’esu’ega peita’i e toe faaola tupe o le totogi o le a lē maua pe a mae’a le su’esu’ega e toe faaauau ona galue le ofisa sinia o le ofisa sooupu a le malo.
