O le iai o le atunuu i lenei vaega o le tausaga i fautuaga ma lapataiga mai lea taimi i lea taimi ona o uiga o le tau, ua faamatalaina ai e le ofisa vaaitau le Ele Nino, o atululuga o le Vasa Pasefika, o ni vaaiga masani o le tau i tausaga taitasi mo Samoa.
Faaalia i se faamatalaga i fesootaiga a le ofisa vaaitau, o i tonu e lotolotoi ai uiga louloua o le tau e aofia ai uila ma faititili, timuga mamafa ma le faata’uta’u, ma le galua o le vasa poo le sami.
E felafoa’i lona nofoaga i Matu ma Saute o Samoa e fuafua i le vaaitau, ma e fuafua foi i le nofoaga e faaputuputu ai ao ma timuga mamafa ona o ogasami mafanafana.
O le taimi lenei e pei ona faaalia e le vaaitau ua ufitia le vasa Pasefika i le Ele Nino, e iai foi ona aafiaga ia Samoa ona o le taimi lea e tele ina sola ese ai le atululuga mai ia Samoa ma nofonofo i Matu ma faaitiitia ai timu.
E ui e maua timuga e feololo le mamafa i nisi o taimi e matele i le faaaoauli ma luga i atumauga, ae tele ina lagi lelei ma mugala.
O le sone ua tā’ua o le Atululuga o le Vasa Pasefika o lona faa-Peretania o le South Pacific Convergence Zone.
O lenei faamatalaga mai le vaaitau ua tau faamalamalama ai faamaumauga faasaienisi o uiga o le tau ua ta’ua o le Ele Nino.
