Ua faailoa e le pulega o le Iunivesite aoao a Samoa mafuaaga o le faapa’ū o le lesitala mo fanau e ulufale i le iunivesite mo lenei tausaga i le tuanai ona tali le Minisita o aoga taaloga ma aganuu i le palemene sa tali ai i fesili a nisi o sui usufono, i le taugata o pili aoga.
I le pepa o faamatalaga ua faaalia ai e le Iunivesite, o le lē gafatia o le lesitala e $322 i le amataga o le tausaga faaleaoaoga sa faafaigatā ma faatuai ai ona lesitala nisi, ma sa lē aooga ai lava nisi o le fanau i tausaga ua mavae. O le mafuaaga lea ua faapa’ū ai le lesitala i le $122.
O le $200 lea sa $322 ai le lesitala, o le pili masani lava lea o le faagaioiga o galuega faaofisa mo le lesitala. Peitai o lea ua tuu i tua e faaopoopo i le piliaoga o le Semesa 1 e totogi mulimuli i le Vaiaso 5, lea e faagata ai piliaoga, poo le faia o se maliega e togitogi ai ae faagata i le Vaiaso 14.
O loo iai foi le fuafuaga a le pulega e na o le tasi le lesitala mo le tausaga atoa, o lea ua mafua ai ona aveese le $200 e masani ona totogi e faagaioi ai le lesitala ia Iulai, ae tuu i le piliaoga o le Semesa 2 e faaagaga mo auaunaga faatekonolosi o loo faaaoga e tama ma teine aoga.
A fua i le tuufaatasiga o pili o le tausaga faaleaoaoga, e le o siitia tatou piliaoga. Ae e ono foliga ua siitia le piliaoga i le semesa pe afai o ave se pepa Komepiuta.
A silasila ane i le tatou Kalena o le 2023, o soo se pepa Komepiuta lava e $492 i le pepa, o lona uiga e $100 e sili atu ai nai lo le tau e $392 o pepa mai isi mataupu.
