E 10 vaiaso na faagasolo ai le polokalame ua ta’ua o le Project Gateway sa lagolagosua iai le Ofisa a le Amepasa o Amerika i Samoa lea na faamae’a i lenei vaiaso.
O lenei polokalame sa agai lea i tupulaga talavou ma tamaitai o loo nofo sala i le toese i le toe aoaoina o mafaufau i vaega e toe fuataina ai o latou olaga.
O loo unaia malosi lenei polokalame e le Matagaluega o Leoleo ma Falepuipui e tauala atu i la latou faigapaaga ma se faalapotopotoga poo le Light of Hope.
E to’a 6 tupulaga talavou na auai ai ma aoaoina i le tāua o filifiliga lelei e manuia ai ma filifiliga e afua ai ona nofosala i le toese.
Ae le gata i lena ae o le toe fuataina o amio ma nisi o metotia e mafai ona fesoasoani e foia ai faafitauli i taimi faigata o le olaga.
O le 12 o tamaitai na auai na patino lea i se polokalame e suia ai o latou olaga e unaia ai i latou ia mafai ona maua se lumanai lelei ma ia mautinoa lo latou tāua i totonu o le li’o o aiga, afioaga, ekalesia ma le atunuu.
I le faamae’a ai o lenei polokalame na tufa ai tusipasi e aloaia ai le auai o i latou o loo nofo sala i le toese i le tāua o nei aoaoga.
