Ua manumalo le finauga a loia o loo tulai mo Talalelei Pauga i Ausetalia,e pei ona iai le faaiuga a le Faamasinoga maualuga a lea Malo na fofogaina i le aso Faraile na tea nei ile aai o Perth ile setete o Ausetalia i Sisifo, ua soloia ma faaleaoga ai le talosaga a loia i lea atunuu o loo finauina le talosaga a le Loia sili a Samoa, e agavaa pe eligible, ona aumai faapagota lea tagatanuu o Ausetalia e tali i moliaga o le taupulepule e tagatavale le sa avea ma Palemia o lo tatou atunuu.
Ua faaalia ile faaiuga e le agavaa ona aumai faapagota Talalelei Pauga, ma ua faaleaoga ai e lea faamasinoga ma le tusi saisai le warrant, na tuuina atu mo le pu’eina o Talalelei, ae ua poloaina e le faamasinoga maualuga a Ausetalia le ave o le talosaga a le Loia sili a Samoa e toe tagofia e le faamasinoga maualalo a lea atunuu le Magistrate court, ma iloilo ai ma le faaiuga na tuuina atu ai le tusi saisai e pueina ai Talalelei Pauga e pei ona nofo taofia ai pea ile taimi nei, seia suesueina ia vaega e le faamasinoga maualalo ile aso 7 o le masina fou o Oketopa.
E pei ona silafia o lea ua toe faatulaga e le faamasinoga sili a Samoa le valaauina o molimau o le moliaga o le taupulepule e faaoo le maliu ile susuga Tuilaepa L Sailele Malielegaoi sa avea ma Palemia, ile masina o Fepuari o le tausaga fou 2023. O lo’o molia faatasi i lea moliaga solitulafono Lema’i Faioso Sione ma Malele Atofu Paulo, lea o loo mafua ai ona finau le itu a leoleo e ala ile Loia sili e aumai ma Talalelei Pauga e suesue faatasi o latou moliaga.
