Ua faalēaogāina nei le oo atu i le 440 o laisene o aveloli ina ua maua i sa’ili’iliga ma su’esu’ega a le Pulega o le NZ Transport Agency Waka Kotahi, i tulaga faasu’etusi na māua ai, e lē moni ma sa’o faamaumauga ma faamatalaga na tuuina atu e faatino ai vaega uma mo le taulimaina o laisene aveloli.
Faamauina i lipoti a su’etusi, e fai lava sina tele o eseesega o faamaumauga na tuuina atu i totonu.
Māua o le tele o faamaumauga ma talosaga e iai ni vaega ua suia e pei ona faatino i le faaliliuina o laisene mai lea faatulagaga i le isi faatulagaga.
O lea na faamaonia mai e le Faatonu o le Pulega o Fela’ua’iga Land Transport, Mike Hargreaves, ona o nei tulaga ua faia ai le faai’uga e faalēaogā uma laisene a i latou ua aafia.
I lalo o le tulafono, soo se tasi lava e tuuina mai ni faamatalaga ma faamaumauga taufaasesē ma le lē sa’o i le faatino ai o le talosaga mo se laisene, e sala tupe ma e oo atu lava i le $750 le sala e totogi e le tagata na te faia lea gaioiga.
Ma e tusa ai ma le faaliliuina o laisene mai isi atunuu, e tatau lava ona faaalia faamaumauga mautū, aloa’ia ma le moni e faatino ai talosaga, o lona uiga e tatau ona faaalia le laisene a o le’i mae’a le taimi faatulagaina o le faaaogāina ai o le laisene poo le (current or expired within 12 months), e le’i taofia mo se taimi (suspend) ma e le’i aveesea ma taofia le faaaogāina (revoked).
O atunuu o loo tuusaunoaina le faaliliuina o laisene ona o loo ogatusa aiaiga ma ta’iala tau laisene avetaavale e aofia ai Ausetalia, Peretania, Amerika, Kanata ma le tele o atunuu o loo i lalo o le Iuni a Europa, Iapani ma Aferika i Saute.
E pau le vaega e faatino e i latou mai nei atunuu o le faia o le su’ega, ae mo atunuu e lē o aofia i lea lisi e tatau lava ona uia ia auala, o le toe faia o le su’ega ma faatino su’ega i luga o le auala.
Ua faaalia foi le aga’i ai o le NZ Transport Agency e faamalosia aiaiga ma ta’iala ina ia faaitiitia ai tulaga o faiga faaālatua ma soligatulafono o le maua ai o laisene aveloli e aunoa ma le faatino sa’o o auala e tatau ona maua ai.
