Ua faaleaoga e le Komisi o galuega a le Malo le PSC poo le Public Service Commission nisi o avanoa faigaluega tumau poo permanent positions, i le vaega o ofisa ma tulaga o ofisa sinia poo principal officers, a o tapena ai le komisi i le faia o se iloiloga poo se review i ia avanoa faigaluega.
Ua faailoa i se faasalalauga a le komisi poo se Circular na tuuina atu faalauaitele i auaunaga uma a le Malo i le tau faaiuiuga o le masina o Tesema na tea nei, lea finagalo o le Komisi e aunoa ma se faamatalaga o faailoa ai ni mafuaaga.
O nisi o avanoa faigaluega ua aafia i lea faai’uga o le 40 o avanoa mo ni alii ma tamaitai leoleo i le tulaga o le constable.
Peitai ina ua fesiligia le Komesina o leoleo i lea tulaga, na ia faailoa ai o le tulaga lea faaleoleo e le tatau ona aafia ai ona o le totogi amata e 12 afe tala i le tausaga.
O le a faatoa faamautu le tulaga tonu o le aafia ma le lē aafia o ia avanoa faaleoleo i le finagalo o le Komisi o galuega a le Malo, pe a mae’a se fonotaga a le Komesina ma le pulega o lana matagaluega ma le vaega o auaunaga lautele le corporate service lea o loo gafa ma galuega tau totogi o Malu o le Malo faapea isi tulaga tofi i totonu o le matagaluega o leoleo, falepuipui ma le ola toe fuataina.
Faaalia e le komesina o leoleo le susuga Auapaau Logoitino Filipo o le 40 o avanoa faaleoleo i le tulaga o le constable o avanoa o Malu o le Malo ua lē o toe galulue.
