Ua faatonuina e le faamasinoga sili le faatino loa o tiute faaletulafoo o le Ofisa o Tausi Mavaega i le vaevaeina o aseta ma meatotino a lē sa avea ma Faamasino Sili, le afioga Patu Tiavaasu’e Falefatu Maka Sapolu e tusa ai o lana uili na sainia i le aso 25 o Setema o le tausaga e 2020, ma ia aveesea ai le taofiga faaletulafono o le vaevaeina o meatotino poo le caveat na faamauina i le aso 13 o Aperila o le tausaga nei 2022.

O le taunuuga lea o le mataupu tau faamasinoga i le lu’i faaletulafono na tuuina atu e Iliganoa Daphne Sapolu o le faletua o lē e ana le uili.

O le Aso Lulu o le vaiaso nei na fofogaina ai le faaiuga i lenei mataupu ma ua faaleaoga ai le talosaga a le faletua o lē sa avea ma Faamasino Sili.

Ua faaleaoga foi ma ana mau sa tuuina atu, sa ia tuuaia ai le tuafafine o lē e ana le uili le afioga Luamanuvao Katalaina Sapolu o se loia ma o le Komesina o Sulufaiga, ma le susuga Maka Komisi Sapolu, o se atalii o le uso o Patu sa liliu faaletulafono i lona tuaa tina ae sa ia tausia mai le fa o ona tausaga ma avea ma ona atalii, i le faia o se gaioiga faaalatua i le tapenaina o le uili.

Ua faaalia i le faaiuga ua le mafai e le itu tagi ona tuuina atu ni mau e faamaonia ai lea tuua’iga. O le faaiuga lenei ua le talia ai le molimau a Iliganoa sa ia finau ai, e tuumalo lona toalua faaipoipo e leai se uili na ia sainia. 

O le molimau foi a le itu talosaga poo le itu tagi sa tulai ai se tamaitai Niu Sila e poto faapitoa i tulaga tau forensic i le suesueina o le saini a lē e ana le uili, ua le faamalieina le faamasinoga i mau sa folasia e lea tagata poto faapitoa.

O le taunuuga atoa o lenei finauga ua toe faatumau le uili ma tagata na vaevae iai meatotino e aofia ai ma le faletua o lē sa avea ma faamasino sili o ia lea na faauluina le tagi.

Ua faaalia e le loia sa finauina le talosaga o le a maua se isi faaiuga i le toe apili o le faaiuga pe a mae’a ona feiloai ma lē na faauluina le talosaga i le faamasinoga.

Ae mo le itu na tuuaia ua faaalia e le susuga Maka Komisi Sapolu ina ua fesiligia i le mae’a lauina o le faaiuga, o le tali lea mai le Atua.