Ua lua ai nei tausaga o faatino le faamoemoe ale Iunivesite ale atunuu e tuufaatasia ai le faalauiloaina o ana polokalame ma auaunaga faatasi ai ma aso ole aganuu faaSamoa.

O le toe tatala o faitotoa ale Iunivesite mo alo ma fanau tausaga 13 i Kolisi maualuluga i Upolu nei ona ole manuia o lona faatinoga ile tausaga ua mavae e pei ona faailoa ile saunoaga ale Pule Sili ole Peresitene foi ole Iunivesite Professor Tuifuisaa Patila Amosa.

“Ole laolao lenei e mafai ai e fanau oloo i tausaga faaiu i Kolisi e maimoa foi ma tapue faamatalaga o auaunaga ma polokalame oloo aotauina ile Iunivesite mole faafaigofie ole ulufale mai pea manuia taumafaiga i suega ole S.S.L.C.”

“Faafetai foi i aoga ua auai ile taliaina ole faatalauula atu e omai ai tamaiti aoga e faamausali le iloa male silafia i vaega eseese e moomia pea tapena mai mo le tausaga faavae i le Iunivesite nei.”

“O se avanoa foi ia maua uma ai e fanau aoga le lagona mitamita i la tatou aganuu ma la tatou gagana e pei ona tuufaatasia ao nei faamoemoe e lua ile aso.”

O faafiafiaga mai polokalame eseese oloo aoaoina ai fanau ale atunuu faatasi ai male anoanoai o polokalame faagasolo na tapena ai le Iunivesite ina ia foi fanau aoga i o latou faleaoga oloo iai se aoga olenei aso mo i latou.