O lenei lipoti o loo faaalia manino ai le tulaga o loo iai le tamaoaiga o Samoa e ala lea i nisi o atinae aemaise o mataupu o loo folasia i lenei lipoti o loo fai ma popolega i nisi o alamanuia mo le atunuu.

O se tasi o vaega na faasoa ai o le itu tau tagata tafafao maimoa mai fafo o se tasi o alamanuia tele lea i le tupe maua a le atunuu na saunoa ai le Peresetene a le Samoa Chamber of Commerce, Seulupe Michelle MacDonald i le tulaga o loo iai pisinisi tuma’oti tau turisi a o tau toe faaolaola ai talu mai le pepesi ai o le faama’i koviti i nai tausaga ua mavae.

“Ua mae’a ona faatautaia e le Samoa Chamber of Commerce se tasi o ana suesuega i pisinisi tuma’oti e silasila ai i le tulaga o loo iai le faagaioiina o a latou pisinisi talu mai le malosi ai o le pepesi o le faama’i o le koviti ma le toe tatala ai o femalagaa’iga i le tausaga ua mavae ia Aokuso.

“Ou te iloa o le vaega pito sili ona mātele ai le popolega o pisinisi tuma’oti o le vaega lea tau turisi ma lona toe atinaeina mo le silafia foi o le alamanuia tele lea i le tamaoaiga o le atunuu.”

E silia ma le 130 pisinisi tuma’oti sa oo atu ai suesuega a le S.C.C. o iai aafiaga i le tulaga i le tau o le toe atinaeina o le pisinisi, o avanoa e mafai ai ona access i seleni e faatino ai pisinisi e ui ina iai fesoasoani a le Malo o loo faamatuu atu ai e toe amatalia ai talu mai taimi o le koviti o se vaitau faigata lea mo pisinisi i le atunuu.

Saunoa Seulupe o se tasi vaega e ao ina silasila ai o le iai lea o se isi itu e agai ai ina mafai lea ona faaauau pea tulaga tau atinae o turisi i le atunuu.

“Ua tele a tatou faatoaga o loo iai seleni teu faafaigaluegaina e le tatou Malo ma e ese foi lea ituaiga alamanuia tau turisi e ese mai i le ituaiga alamanuia tau turisi ua masani ai ma o se suiga tele foi lea mo Samoa ma le atinaeina o lona tamaoaiga.”

E 45 atunuu na aofia i lenei lipoti e aofia ai Saina, Initia ma Indonesia.