O le oo atu ai o le Matagaluega o Faatoaga i le motu tele i Salafai e amatalia ai le faalauiloaina o se tasi o ana fesoasoani i le aufaifaatoaga e ala i mailei e faaaogā i meaituaolō e faaitiitia ai le ‘aina o meatotō.

O se tasi o kamupani mai Amerika lea ua mafai ona faatauina mai ai nei mailei auā le fesoasoani i le aufaifaatoaga.

Saunoa le Minisita o Faatoaga, Laaulialemalietoa Leuatea Polataivao Fosi Schmidt, o le a omai le kamupani mai Amerika e momoli mai mailei ma aoaoina le aufgaigaluega faapea ai ma faifaatoaga i le auala e faapipii ai mailei e taumafai ai le saogalemu o meatotō.

O le tatou galuega masani e tatou te o ma agaese ma taifau e tuli ai, ona uma laia o lena aso ae toe omai foi puaa, ae o le tulaga lea laa iai e tatao mailei nei i togavao ma tumau ai lava e mailei ai meaituaolō, poo fea lava la le itu tatou te iai ae o le a o ifo puaa totonu o le mailei ma mau ai.

Ae lē mafai foi ona taofia a tatou mailei o loo faaaogāina ou te iloa e leai lava se faifaatoaga e lē silafia le faaaogāina o mailei puaa e lē mafai foi ona vale tuulima a tatou lava ia faiga.

A omai suiga fou nei tatou te o faatasi a ma suiga fou nei e avatu mailei fou nei ae faatino lava e le faifaatoaga ana ia puipuiga ina ia malupuipuia lana faatoaga.

O le faamoemoe o lenei poloketi ia tofusia uma itumalo ma lenei feasoasoani.

“E lua lea ua omai ma le kamupani lenei mai Amerika ae 10 ua mae’a okaina, e lima mo Salafai lima mo Tumua a alu alu ae lelei le faatinoina o lenei poloketi ona tofusia loa lea o itumalo ma lana mailei.

“A maua foi nei fesoasoani e lē toe iai ai se fesili poo fea o iai o le a avatu lea i ofisa o Fono Faavae taitasi a itumalo ona oatu lea o le Matagaluega e faataitai i le Pule mamalu a Alii ma Faipule ma faaali ai iina ona o a lea o latou e faatino.

“A maua foi ni puaa i mailei nei pule le nuu ae o le oo atu a le Matagaluega ia faafoe ma faasoa atu.

“O aiaiga na o lenei poloketi ae o le mea tāua o lea ua malaga mai sui nei mai le kamupani o loo aumai ai lenei fesoasoani e faamatala auiliili mai pe faapefea ona lelei lenei mailei mo tatou.”

O le tatalo a le Minisita ina ia faaaogā lelei nei meafaigaluega o loo faamatuu mai ina ia tele se taimi o faaaogāina pea.

“E lē taugofie le tulaga o nei meafaigaluega e tatalo atu ai le Matagaluega, o mea faigaluega nei, ia aua le iai le mafaufau masani o mea a le Malo, leai a faamatuu mai loa e le Malo ma a tatou paaga, o tatou e puleaina.

“Poo ai foi le itumalo e amata ai, ia outou alofagia e vaai lelei ma puipui lelei auā o iina e iloa ai le faaauauina o le tatou polokalame lenei.

“O le lagolagosua a le Marketing Development Facility o i latou ia ua faatupeina mailei e 10 e pei ona ta’ua muamua ma mailei e 2 ia ua tuuina fua mai e le kamupani.”

Na ta’ua e Laauli o le isi 3masina o le a toe talanoaina ai lava lenei poloketi ina ia mautinoa le lelei ona faataatia ina ia mafai ona tofusia uma itumalo i lenei fesoasoani.