O le polokalame a le Malo o Amerika o loo faafailele ma aoaoina ai tina ma tamaitai e fia maua tomai e faatino ai se pisinisi, lea ua ta’ua o le Academy for Women Entrepreneurs, ua aumai i Samoa e lea malo ina ia maua ai avanoa o tamaitai o le tatou atunuu e sailiili ai i agavaa ma tomai pe a fia avea ma faipisinisi.

Ua faailoa e le ofisa o le Malo o Amerika i Apia o lana polokalame lenei ua manuia ai taumafaiga tau pisinisi a tina ma tamaitai o atunuu e 80 o le lalolagi.

O loo fua lea i le iloiloina o lana polokalame i le tausaga e 2021 ma iloa ai o le 74 pasene o tamaitai na mae’a lelei a latou aoaoga i tomai ma agavaa faapisinisi na siitia i le 29 pasene le tulaga lelei o a latou taumafaiga e le gata i tupe maua ae o le faaopoopoina o tagata ua latou faafaigaluega.

O le faatinoina o lea polokalame i lo tatou atunuu ua tuu atu ai le taitaiga i le tamaitai o Adeline Mose o le pisinisi o le Makeki online faatasi ai ma nisi ua iai le tomai tau pisinisi e faafoeina ni mafutaga mo tina ma tamaitai o Samoa e fia auai.

Ua amataina lenei taumafaiga i tamaitai e toa 20.