Ua aumai nei i se tulaga faalauaitele fautuaga mai le matagaluega o le soifua maloloina, mo tagata uma i lo tatou atunuu e faatino auala o puipuiga mo faama’i pipisi e pei o le flu, ma le Koviti-19, a o agai atu i le taimi o aso malolo o le Kerisimasi ma le Tausaga Fou.

O lipoti lata mai a le soifua maloloina mo le fitu aso ua tuanai ua faailoa ai e lima gasegase fou o le koviti faaopoopo iai ma le 27 muamua ona maua ai lea o le 32 o tagata ua aafia i auga o lea faama’i.

Ua faailoa ai e le matagaluega i lana pepa o faamatalaga faalauaitele ua faamalosia ai puipuiga mo le flu ma le Koviti-19, o i latou ua maua i auga o lea faama’i ua aofia ai nisi sa malaga mai fafo na faia a latou siaki poo test.

Ua toe fautua ai ma tagata uma i Samoa ia agai e fai tui faaopoopo mo puipuiga o le koviti.

O auga o le flu masani o loo pesi ua fautuaina ai foi le atunuu ina ia faaeteete i le tasi o faama’i le dengue fever ma ia faamamā nofoaga e tau tuufua ai iniseti o le namu auā e feaveaiina siama e mafua ai lea faama’i.

O puipuiga ua toe faamalosia, o le faia o puni fofoga pe afai o aafia i ni auga o le flu ma ia faanofoesea tagata ua maua i le koviti.

O le numera o tagata maliliu i Samoa ona o auga o le Koviti-19 e 31 ma e lē o iai se suiga o lea aofaiga talu mai Mati o le tausaga na tea nei.