O le asō o loo faamanatuina ai e le lalolagi le aso faapitoa o le soifua maloloina o le mafaufau.
O le faatalatalanoaga masani a le Matagaluega o le Soifua Maloloina e pei ona faaalia ai e nisi o sui o loo galulue ai i vaega o loo gafa ma lenei gasegase auaunaga o loo faatino.
Na faaalia e le sui mai le vaega o le soifua maloloina o le mafaufau i le maota gasegase Levaopolo Aliilelei Tenari o le soifua maloloina o le mafaufau e fā vaega o loo faatino ai le auaunaga a i latou o loo galulue ai.
“O gasegase tausavali lea amata mai i le 8 i le taeao seia paia le 5 le afiafi, o le auaunaga foi lea e faagasolo mai ai le mamalu o le atunuu e faatalatalanoa o latou faafitauli, lona lua o le auaunaga o i latou lea ua taofia i le maota gasegase mo togafitiga.
“O i latou uma foi e taofia le falemai o le mafaufau e taofia i lalo o le tulafono e tau o le in patient treatment order ma o le tulafono lea e lē iai se aiātatau a le gasegase poo le aiga e taofia ai le faia o togafitiga ia.”
Ta’ua e Levaopolo e ese mai togafitiga o le gasegase o loo taofia i le vaega o le soifua maloloina o le mafaufau ma nisi o gasegase i isi vaega o le maota gasegase.
“O se togafitiga fai faamalosi auā e ese mai gasegase lautele o loo taofia e pule le gasegase ma lona aiga pe talia togafitiga pe leai a o i latou o loo taofia i le matou nofoaga e tatau ona faatino pea togafitiga i lalo o le tulafono.
“O le tulafono foi e ave lona kopi i tai le ofisa o Faamasinoga e faailoa atu ai ua taofia se tasi ua faaletonu le mafaufau i lalo o togafitiga a le soifua maloloina o le mafaufau ina ia vave foia ia faafitauli.”
O le isi auaunaga o le vaaia lea o i latou o loo aafia o latou mafaufau mai le taeao seia oo ina avanoa o latou aiga.
“E pei o se day care, e aumai o latou tagata iinei i le taeao e vaai ai ona e iai nisi e faigaluega a mānava ona toe piki aku lea.”
O se tasi o auaunaga o le oo atu lea o le aufaigaluega i tua i aiga e faatalatalanoa nisi o loo faapea ona afaina o latou mafaufau.
O le lagolago foi lea a le faalapotopotoga o le Kosena poo le Goshen Trust e pei ona faailoa ai e le Pule Sili Naomi Eshraghi.
“O le isi lala lea i le li’o o le togafitiga o tagata ua iai aafiaga o le mafaufau i le itu lea o le tausiga poo le toe momoliina lea o le gasegase i o latou aiga.
“O i la e faapitoa ai le auaunaga a le Goshen ona o loo iai aiga ma afioaga foi ua lē taliaina i latou o loo iai aafiaga o le mafaufau.”
E pei ona iai le autu o lenei aso faapitoa i le lalolagi o le soifua maloloina o le mafaufau o le aiātatau lea a le tagata.
“Ua maua le avanoa mai le Matagaluega o le Soifua Maloloina e iloiloina ai auala e mafai ona faatinoina ma le filemu poo puipuiga o tagata mai le lē malamalama o le mamalu lautele.
“Lea o le a faatino ai faatalatalanoaga ma le mamalu o le atunuu ia iloa ai poo ā ni fesoasoani o loo moomia ma ia faigofie i le tagata ona talanoaina lenei mataupu.”
