O le susuga i le alii foma’i ia Dr Sebastian Paulo sa avea ma sui o Samoa i Ausetalia i se fonotaga ua ta’ua o le Australasian Society for Ultrasound in Medicine (ASUM) Conference 2025.
O se fonotaga na lagolagoina e galuega fesoasoani faafoma’i a Niu Sila – New Zealand Medical Treatment Scheme (NZMTS) e tauala mai i le polokalame o le saga faalaua’iteleina le tomai o tagata galulue.
Na molimauina le omai faatasi o tagata atamamai ma ē o foa’i faapitoa i lea fonotaga mai le tele o atunuu; ma na vaaia le aga’i tonu o le fonotaga i le faalaua’iteleina o le tomai o foma’i e faatino ma faaaogā ai masini faaneionapo – ultrasound i taimi o a latou galuega aemaise i siaki a tagata gasegase (focusing on advancing ultrasound use in clinical practice).
Faamanino e le alii foma‘i Samoa, lona agaga faagaeetia i le avanoa, ua ia ta’ua o se avanoa ua mapuna ma faaosofia ai ona lagona o le finau mo tatou tagata Samoa ia maua ia avanoa – ia atina’e ai faalaua’itele le malamalamaga i tomai faapitoa auā le faaleleia atili o le auaunaga o faalavelave e tutupu faafuase’i, poo le vaega o emergency care.
Faamatala foi e Sebastian Paulo o se avanoa lelei foi lea mo Samoa e saga faamausalī ai fesoota’iga ma le tele o paaga mai itu e fia o le kelope mo Samoa ma ana taumafaiga e siitia tulaga lelei o lana auaunaga faasoifua mālōlōina i ē muamua tali atu i nai tagata e autovaa atu i maota gasegase.
Faaopoopo Paulo, o vaega uma sa ia maua mai i lea fonotaga tāua o lea ua amata faasoa atu e ala i le polokalame o le Samoa’s Point of Care Ultrasound for Emergency and Acute Care in Resource-Limited Settings (PEARLS).
Ta’ua o loo faatino se sa’ili’iliga a le alii foma’i i le faatinoga o le galuega e faaaogā ai lea tomai i si’osi’omaga e lē gafataulimaina le tele o alaga’oa.
Faafetaia e Paulo le Pasifika Medical Association mo lea avanoa.
Puna o Faamatalaga: https://pmagroup.org.nz/updates/nzmts-empowering-samoas-emergency-care-through-ultrasound-innovation
