O le galulue faatasi ai o le Matagaluega o Tina ma Tamaitai, faalapotopotoga o tina ma tamaitai a Malo Aufaatasi ma le Samoa Business Hub ina ia mafai ona faalauaiteleina le tomai o faipisinisi i nisi o vaega e ao ina silafia mo le agai i luma.
O nei vaega e aofia ai aoaoina o i latou i le faaaogāna o tupe, o le itu tau laisene o pisinisi, aemaise ai o teugatupe i faletupe i le atunuu.
E le gata i lea o le aoaoina lea o le aufaipisinisi laiti e ala i le faaaogāina o auala faatekonolosi e faalauiloa ai a latou pisinisi ma o se auala vave foi lea e tusa ai o lenei vaitau i auala o fesootaiga.
Saunoa le sui o le faalapotopotoga o tamaitai a Malo Aufaatasi, Papalii Mele Maualaivao e tusa ai o lenei galuega faifaatasi.
“O le tāua lea o le faigapaaga ma nisi foi o matagaluega a le Malo ma faalapotopotoga e patino tonu ai lenei faamoemoe ia mafai ona fesoasoani ai i nai tina ma tamaitai e aoaoina i latou i vaega e manuia ai a latou pisinisi.”
O lenei aoaoga o se vaega i le poloketi ua ta’ua o le Markets for Change ma o loo galulue soosootau’au ai ma nisi o faalapotopotoga i le atunuu e pei o le faalapotopotoga o atina’e a Malo Aufaatasi poo le UNDP, ofisa o tupe totogi mo faalavelave faafuasei, Samoa Land Corporation, Matagaluega o Faigafaiva ma nisi.
O le Aso Tofi ma le Aso Faraile o le a fuafua e faia ai lenei lava aoaoga i le motu tele i Salafai.
