O le faaiuga o le vaiaso ua mavae nei na taualuga ai le faaaliga a le Life-Con Pacific lea na molimauina le tulaga maualuga o agavaa ma taleni a o tatou tagata e le gata i mamanu o laei eseese, o le teuteuina o fofoga ma ao o tamaitai ma alii na faaalia.
O lenei faamoemoe ua faailoa ai e le Palemia, Afioga Fiame Naomi Mataafa le talenia ai tagata Samoa.
“E talenia o tatou tagata e mamanu ma su’i laei e atagia ai la tatou siosiomaga ma la tatou aganuu.”
Na faafetaia ai e Fiame i le ae o le tofa ua mafua ai ona faia pea lenei faamoemoe e fai ma auala e fesoasoani ai i le faalauiloaina o tomai ma agavaa o tagata i lea matata ae le gata i lea o le maketiina o nei oloa.
“O a tatou taleni tomai ma agavaa o a tatou faiva alofilima ia na foaiina mai e le Atua tatou te galueaina.
“Afai e mapo ona galueaina ona tupu mai ai lea o faamanuiaga e autupulagā ma e manatua pea.
“O faamoemoe faapenei e saga matimati ai lo tatou naunau ina ia siitia taleni i se isi laasaga maualuga.”
O se tasi o vaega tāua o lenei faaaliga na saunoa ai Fiame o le ogatasi lea ma fuafuaga alualu mamao a le Malo.
“O avanoa tutusa, o le faatāuaina o sao o tina ma tamaitai i totonu o faiga filifiliga a Malo, o la tatou tali atu i suiga eseese o le tau, o le unaia o tomai i le atina’eina o tamaoaiga i aiga ma le atunuu ma le tele o nisi vaega o loo momoli feau mai e lenei faaaliga.”
O le auga lava o lenei faaaliga ina ia maualuga ma faalauaitele auala e maketi ai oloa a o tatou tagata faipisinisi aemaise o taleni eseese o loo molimauina i lenei foi faiva alofilima.
