O le uluai fono a le Tamaitai Palemia ma Minisita o lana kapeneta na usuia i Savaii i le Aso Lulu o lenei vaiaso, ua faia ai ma le faaiuga i le lipoti a se komiti na tofia, ia toe silasila i aiaiga e filifili ai tagata mo galuega faavaitaimi.
Ua faailoa lea tulaga e le Minisita o le Matagaluega o Pisinisi Alamanuia ma Leipa o loo vaaia le polokalame lenei, peitai ua faailoa e le minisita le tofa Leatinuu Wayne Sooialo i le polokalame o le Soalepule a le TV2, o le vaiaso fou e faatoa faailoa ai lea faaiuga.
Ua faailoa foi e le Minisita o le taimi nei e na o le tasi lava le malaga i le masina mo tagata faigaluega faavaitaimi mo Niu Sila ma Ausetalia, ae o loo iai pea nisi tulaga e le o usitaia ai e le matagaluega o feagai ma le filiina o tagata faaiuga a le Kapeneta.
O le polokalame foi lea o le Soalepule na faailoa ai e le Minisita o loo iai le vaaia o le Faalapotopotoga o eleele o le Malo le Samoa Land Corporation, e 2 afe tagata o loo i le lisi faatalitali i le fia maua o ni fanua o le Malo e faamautu ai, pe faia ai foi ni atiina ae tau faatoaga.
Peitai ua faaalia e Leatinuu o loo iai nisi o to’a i talosaga a i latou o fia maua ni fanua, ona e iai nisi ua oo i le selau eka o fanua o loo latou lisiina, ae o loo vaomatua le tele o ia eka e le o faaaogaina.
O le isi faafitauli o le toatasi o le tagata ae o loo ia lisiina uma ia eka e tele, ae ua silasila nei le Malo i se isi faiga ina ia maua e tagata uma le avanoa e faaaoga ai ia fanua e le gata mo faatoaga ae o le nofoia i se tulaga faalisi.
O le taimi nei e le o toe faatauina ni fanua o le Malo i se tulaga e umia ai e tagata ona o le faiga faavae mai le faigamalo sa iai.
Le afioga i le Minisita le tofa Leatinuu Wayne Sooialo.
