O le taofia e le komiti e pulea le avamalosi o le toe gaosia o nisi fagu malosi sa taugofie ae sa iai atugaluga i le maualuga o le pasene o le avamalosi, ua faailoa e le matagaluega o leoleo ua telē se suiga ua iai nei, i le faaitiitia o tagata e molia i ni solitulafono ae sa taumafaina ia ituaiga o ava malosi.

O le beer o le Taula e pei ona faailoa i faamaumauga a le matagaluega o leoleo ma faamaonia mai e le sui Komesina susuga Papalii Monalisa Tia’i Keti, o le avamalosi lea ua toatele i latou ua aafia i soligatulafono sa latou inuina. 

Ua faailoa foi e le sui komesina o fuafuaga a le komiti e pulea le avamalosi i itula e tatala ma taofia ai le faatauina o le avamalosi i aso fiafia o le kirisimasi ma le tausaga fou, e lei faamautuina i le taimi nei.

Peitai ua tapena le matagaluega i o latou tiute masani i le faamalosia o tulafono o le avamalosi i aso fiafia o le faaiuga ma le amataga o le tausaga fou.