Ua faamanatu e Samoa le aso faavaomalo o Fale Mata’aga i le lalolagi mo le tolu ai lenei o tausaga.

O se aso ua faaalia e le minisita lagolago o le matagaluega o aoga taaloga ma aganuu, e tāua tele auā o fale mata’aga o loo teumalu ai tala tuu, ma tala o le vavau aemaise o measina a atunuu e aogā ma tāua mo tagata uma ma tupulaga mo a latou aoaoga ma mataupu tau i talafaasolopito.

O le fale mata’aga fou i Malifa lea sa faatupe i se fesoasoani a le Malo o Saina na tapuvae tasi iai polokalame o lea aso faailogaina.

O loo teumalu ai i le fale mata’aga nisi o a tatou measina o galuega alofilima, faapea isi faamaumauga tāua o le tatou talafaasolopito.

Sa auai ma nisi o fale mata’aga o loo teumalu ai foi nisi o a tatou talafaasolopito ma measina e pei o le Tiapapata Art Center, o le Art Gallery, ma le Fale Mata’aga o le alii tusitala Sikotilani o Lopati Lui Sitivinisone o loo i Vailima.