Faailoa matati’a ua ausia e le UTOS, le Faaputugatupe o Mavaega Tausi a Samoa

A o tālia ai nei le isi fono faaletausaga a le faalapotopotoga o faaputugatupe o Mavaega Tausi a Samoa le UTOS e faia i le masina o Novema o le a faailoa ai lana lipoti mo le tausaga nei 2022, o lea ua faailoa e lea faalapotopotoga tuma’oti a le Malo i lana lipoti o le tausaga 2021 le maoa’e o ni matati’a na latou ausia, aemaise le siitia o le numera o tagata fai iunite poo i latou o loo teu faafaigaluega a latou seleni i le faalapotopotoga.

I se pepa o faamatalaga mai le UTOS i le mae’a o lana fonotaga lea ma sui fai iunite e to’a 129 ua faailoa ai, e 42 miliona iunite o le faaputugatupe o loo umia e ia tagata poo le 51 pasene o tupe teu faafaigaluega o loo umia e i latou ia.

O nisi nei o matati’a na ausia e le Faaputugatupe i le Tausaga Faaletupe na mae’a ia Iuni 2021:

• 16% ua siitia ai fuainumera o au fai iunite pe a faatusa le tausaga Faaletupe 2020 (TF2020: 3,299)

• Faamauina le 10 sene siitiaga o le tau o le Iunite mo le tausaga Faaletupe 2021 (Iulai 2020: $1.66)

• E $6.60 miliona le aofai o tufatufaga faaagaga mo au fai iunite, e tusa lea ma le 6.6% le siitaga o tufatufaga pe a faatusa i le tausaga faaletupe 2020 (TF2020: SAT$6.19m)

• E 3.48% ua siitia ai le aofaiga o tupe teufaafaigaluega lea ua o’o atu i le $164 miliona i le mae’a ai o le tausaga faaletupe 2021. (TF2020: SAT$158m)

• E 25% na siitia ai Tupe maua a le Faaputugatupe pe a faatusa i le tausaga 2020, o le siitia o tupe maua e mafua mai lea i faai’uga lelei e faatatau i auala o lo’o faafaigaluegaina ai tupe. (FT2020: SAT10.4m)

• I lona aotelega, e $7.55 miliona le aofaiga o tupe maua faasili na faamauina e le Faaputugatupe mo le tausaga faaletupe 2021, ae sa $7.54 miliona i le tausaga 2020 (FT2020: SAT$7.54m)

• E $139 miliona le aofaiga o Aseta Maoti a le Faaputugatupe sa faamauina i le Aso 30 Iuni 2021 (TF2020: SAT$125m)

• E $170 miliona le aofaiga o Aseta i lona aotelega a le Faaputugatupe sa faamauina i le Aso 30 Iuni 2021 (TF2020: SAT$164m)

O le fono faaletausaga na usuia i le Aso Faraile na te’a nei sa auai ma le tamaitai Minisita o Tupe mo le taimi muamua talu ona filifilia le afioga Mulipola Anarosa Ale Molioo na te vaaia tupe a le Malo.

O le autu na faavae ai le UTOS poo le faalapotopotoga o faaputugatupe o Mavaega Tausi, o le manuia o tagata uma; ia saunia ni auala faigofie ma taugofie e teufaafaigaluega ai seleni a so’o se tagatanu’u Samoa.

Ae o lana anava faapisinisi, ia ausia ni tupe faasili mo ana au fai iunite mai ana teugātupe ua mae’a ona iloilo toto’a.